Siguir p’alantre
Enedina a medianueche
![](https://www.semananegra.org/wp-content/uploads/2024/07/Abel-150x150.jpg)
Abel Martínez González
2024-07-07
Unos segundos dempués la maniya xiró despacio y, al abrise, vio la figura d’un home.
Enedina suponía que, siendo de nueche como yera, naide que nun fuera personal o internos podía andar pela residencia. Por embargu aquel home que taba tiesu embaxo’l quiciu de la puerta nun tenía aspeutu nin de lo uno, nin de lo otro: Altu, fuerte, calvu dafechu, vistíu con un traxe negru axustáu que se-y pegaba’l cuerpu musculosu, y con gafes escures pese a ser de nueche.
Con too, lo que-y causó ciertu desasosiegu-y foi aquella sonrisina que se-y curvaba nos llabios.
Enedina dexó de puxar na almuhada, la otra paró d’espatuxar y l’home nun fizo nada.
—¿Qué tal va la cosa? —Preguntó él de repente. El tonu de la so voz yera amable, nin rastru de reproche. L’asesinatu nun paecía importa-y.
Abrió la boca pa responder, pero enantes que pudiera dicir nada una voz detrás d’ella adelantóse-y.
—Podía ser meyor. Pero con too nun ye ún de los peores casos. Pa nada.
Volvió la cabeza y vio que la so compañera, llonxe de tar muerta, como albidrara cuando dexara de ximelgase, taba sentada na cama, mui derecha y mui seria.
Yá nun paecía mayor qu’ella.
—¿Consideres que val la pena siguir p’alantre con esta? —Entrugó de nuevu l’home.
Esta vez Enedina entendió que la pregunta nun diba dirixida a ella. De fechu decatóse de que los otros falaben como si nun tuviere presente.
—A ver —contestó la que yá nun paecía la so compañera encoyendo los hombros—. Ye lo que hai.
Al sentir esto l’home asintió y calcó no que fuera’l botón de prender la lluz; pero dalgo na cabeza d’Enedina paecía querer dici-y que yá nun yera eso.
Casi. La lluz prendió, sí. Lo que pasa que lo allumó nun yera’l so cuartu.
Continuará…