Probe de mí, sí. Y nun ye porque s’acaben les fiestes de San Fermín, non: cada ciudá que s’ocupe de les suyes. Ye porque me duel, duelme Xixón. Presumo nes rutes histórico-lliteraries que faigo per Cimavilla del nuesu pasáu, onde destaquen pol so papel les muyeres: pescaderes, mariscadores, vendeores ambulantes, trabayaores fabriles… y toles que nel llar suplieron con inxeniu la falta comida y les munches boques qu’alimentar a lo llargo de los sieglos.

Dende la Prehistoria a la Edá Media, la presencia de les muyeres ye una constante, como cazadores, collechaores, texedores, sanadores, alfayateres, comadrones, criades, cocineres, hospitaleres, campesines, artesanes…

En Xixón, a mediaos del sieglu XVIII, el Catastru del Marqués de la Ensenada yá numberaba decenes de oficios femeninos, fundamentalmente rellacionaos col comerciu al por menor: quincalleres, buhoneres, vendedores de saín (grasa de pescáu más barata pa cocinar qu’el aceite o la mantega), morrongueres, regatones (fruta, lleche, quesu, manteca…), vendeores de aguardiente…

Na segunda metada del XIX, tres la inauguración de la carretera Uviéu-Xixón y el ferrocarril de Llangreu, el puertu de Xixón ye’l mejor de toa Asturies y esto fairá que pequeñes fábriques comencipien a instalase na villa espoxigándose yá una incipiente actividá industrial na fastera Oeste. Asina, crearanse fábriques de tabacu, vidriu, siderurxa, sombreros, loza, cerveza, sidre, chocolates… onde trabayen muyeres en condiciones infrahumanes: catorce hores de pie hasta les preñades, a la llume d’unes veles que-yos descuenten del salariu y por un sueldu que nun algama ni el quintu del d’un paisanu.

Nel añu 1888 nauguróse la traída d’agues de Llantones, la plaza de toros d’El Bibiu, el teléfonu públicu y el balneariu de les Carolines. Esi mesmu añu, de mano de les pescaderes, vivíemos el nuesu propiu Dos de Mayo, qu’anició cola pretensión municipal de subir los impuestos sobro’l pan y el pescáu, y desendolcó na quema de les dependencies municipales y un sindiós que fizo que retiraren los susodichos impuestos y dimitiera l’alcalde.

Un añu enantes, les cigarreres de la Fábrica Tabacos yá crearen la Hermandá, sociedá de socorru y sofitu a mou de caxa solidaria, onde metíen trés reales mensuales caúna pa cubrir enfermedaes, y la so fuelga de 1903 arrastró primero a les de l’Algodonera y darréu a toles muyeres de les fábriques de la fastera Oeste en llucha pola equiparación de salariu colos homes y la meyora de les condiciones de trabayu.

Mineres, carboneres, modistes, maestres, lliterates, artistes… A midía que se van conquistando espacios y drechos la presencia femenina abarca tolos sectores. La Revolución del 34 y la Guerra Civil provocada pol golpe d’Estáu fascista dexará imáxenes inolvidables del so protagonismu.

Per otru llau, la fiesta les Comadres, que se cellebra el xueves enantes del Antroxu, caltúvose incluso nos años más oscuros del réximen franquista. Y anque quedó reducía a una celebración familiar, que reunía a les fémines de varies xeneraciones —güeles, madres, madrines, fíes, fiaes—,  les muyeres que trabayaben aprovechaben esi día pa xuntase y tracamundiar, hasta onde podíen, l’orden establecíu los otros 364 díis de l’añu. Asina, la tradicional merienda desta cita foi dando pie a una organización de calter asociativu llaboral. Nos caberos sesenta y nos años setenta, la llucha sindical tendrá como señeres a les obreres de Ike y Obrerol, y hai de destacar el papel de les muyeres nel movimientu vecinal tras la dictadura.

En 1986, la Tertulia Feminista Les Comadres recuperará esi espíritu festivu reivindicativu cola so fiesta anual, onde faen entrega de la Comadre de Oro a la muyer destacada pola defensa de la igualdá, y el Felpeyu pa denunciar al paisanu o la entidá más machista del añu. Y nun podemos menos que recordar que foi’l motor de la movilización del Tren de la Llibertá qu’acabaría col ministru Gallardón empobináu a recortar el drechu al albuertu.

Siempres presumí de que toes estes muyeres anónimes, la suma de toes elles, ye’l posu nel que nos formamos les xixoneses, son enforma’l raigón del nuesu ser feminista. Falamos de sieglos lluchando pol drechu a la educación, pol drechu al votu, dexando’l pelleyu y dalgunes la vida pa consiguir una sociedá, una ciudá más igualitaria y más xusta, y agora, si les probes llevantaren la cabeza, volveríen a metela embaxu tierra.

Una muyer ye asesinada cada tres díes. Denúnciase una violación (y la mayoría nun se denuncien) cada cuatro hores. Ye bien triste que seya una muyer, precisamente —que si ye ciruxana y alcaldesa foi gracies a les que la precedieren—, la qu’entregue la ciudá a los facistes misóxinos y machistes, que col so negacionismu dan esnales a la violencia de xéneru. Ye dramático que-yos conceda Cultura, cuando la so única obsesión ye frayar la cultura y la llingua asturianes. Pero que Igualdá tea en manes de Vox, dempués de xurar en públicu que enxamás socedería tal, ye dalgo que nunca-y podremos perdonar.