Llista pa saltar
Enedina a medianueche
![](https://www.semananegra.org/wp-content/uploads/2024/07/Nicolas-radagast-1536x1536-1-150x150.jpg)
Nicolás Bardio
2024-07-12
Y postre diba habelu, claro que sí. Pero primero del postre diba xugar un cachu con ellos. Esfregóse’l cazu col sangre entá pingando y movióse aína pel edificiu, nun supo bien cómo, pero sabía cómo dir d’un cuartu a otro, qué pasiellu llevaba a la zona d’entrada y cuálu a la trasera y, al empar, siguía ensin tener idea d’ónde taba. Chocó-y aquello, pero nun tenía tiempu pa más nada. Resgó con aquelles uñones una de les cortines y vio lo qu’había fuera: Coches de policía. Xusto lo que pensaba.
Les figures siguíen moviéndose. Nun entendía lo que dicíen, falaben un idioma qu’ella desconocía pero que yeren policíes nun había duldes. Unos llevaben escopetes, otros pistoles, dalgún de los que quedaba más atrás subfusiles. Avanzaben coordinaos pero esperdigaos, ella esperábalos nun armariu altu, al pie d’una de les puertes, llista pa salta-y al pescuezu en cuantes la puerta s’abriere. El corazón díba-y a mil. Los pasos averábense.
-Equí – debió dicir una voz.
Al momentu la puerta abrióse, el rayu de lluz de la llinterna apegada a una pistola allumó l’interior de la sala, primero les esquines, depués el centru. Nunca arriba. Nunca pa onde ella taba amatagada. Neses saltó.
Y el saltu duró una eternidá. Too quedó quieto parao. Ella en suspensión. Les uñones afilaes, a piques de resgar la piel del policía, que nun se dexaba gatuñar y que quedaba, nun sabía bien cómo, protexíu por dalguna sustancia que tenía’l tautu del cristal.
– Aparái la simulación- sonó una voz no alto mientres les parees de la casa desapaecíen. Mientres les lluces s’apagaben y l’espaciu configurábase dafechu como namás se configuren nos videoxuegos. Tolo que yera real, de sópitu nun taba, tolo que taba, de sópitu nun-y paecía real.
– Nedina – dixo una voz- Nedina. ¿Sabes por qué tas equí? ¿non?