Una solombra mui negra
Enedina a medianueche
![](https://www.semananegra.org/wp-content/uploads/2024/07/WhatsApp-Image-2024-05-06-at-11.20.30-1152x1536-1-150x150.jpeg)
Solinca Turbón
2024-07-14
Cuando’l médicu que taba de guardia entró al cuartu, cortóse-y de cuayu’l bostezu que taba pegando. Tol personal qu’había na residencia taba ellí aconceyáu. Una enfermera daba-y aire a otra que taba sentada en suelu blanca como la cuayada y ente les otres trés persones qu’había, paecíen nun ser pa suxetar a Enedina, una paciente octaxenaria que nunca diera un problema. Na otra cama, Erundina, la so compañera, taba claramente muerta cola almuhada d’Enedina tovía tapando-y media cara. Aquella muyer lo mesmo aullaba, que pegaba glayíos diciendo que pararan yá les voces, que lloramiquiaba diciendo que tenía munchu mieu.
El médicu zarró la puerta porque con tantu xaréu, de xuru que nun tardaríen en llegar residentes de los más válidos a ver qué taba pasando.
La enfermera que taba en suelu faló como pudo. -Vine a facer la ronda y cuando entré, alcontré asina a la probe Erundina y a Enedina enduviellada nun requexu, casi muerro del sustu…
Agora Enedina farfuyaba daqué d’homes de negro del gobiernu y d’unes puertes.
El médicu tentó poner un poco orden – Hai qu’iguar esto. Ta claro qu’Enedina ta en metá un brote psicóticu venceyáu a la so demencia y que nesti momentu ye peligrosa, como bien nos diría Erundina si pudiera, probe paisanina, ta claro que l’afogó cola almuhada…
Ún de los trabajadores, esti de llimpieza, que facía por sostener a Enedina, que por momentos paecía tener la fuercia de varios mozos xóvenes interrumpiólu.
-Pero si esta señora taba bastante bien, que yo llevo equí tiempu y siempre tuvi alderiques con ella con munchu sentíu…
-Ta claro que’l so estáu cambió, igual ye un cuadru agudu. Hai qu’avisar a la familia d’Erundina diciendo que finó de muerte natural y a Enedina sedala pa que nun seya un peligru nin pa ella nin pa los demás, nun queda otra…
Ente toos punxeron a la paisana encima la so cama y nesi momentu naide se decató d’una solombra mui negra qu’atravesó la puerta y entró nel cuartu en frente onde Cesaria, una de les pacientes más xóvenes, llevantó de la cama darréu, foi a coyer les aguyes de texer y entamó a averase sele a la so compañera que roncaba tranquilamente.