Ganes de postre…
Enedina a medianueche
![](https://www.semananegra.org/wp-content/uploads/2024/07/Carbayales-Autor-4-1536x1288-2-150x150.jpeg)
Adrián Carbayales
2024-07-11
Nun foi hasta que llegó a llamber les coraes qu’empezó a decatase de que’l calvu sabía distinto a tolos homes que tenía comío. El tastu recordába-y a aquella vez que la ñéta-y dio a prebar carne d’eso sintético, fecho con una impresora o nun sé qué-y dixo. Aquel paisanu de traxe nun yera de verdá, taba fechu de la mesma puxarra seco.
La muyer lloba miró alredor, a toes aquelles puertes. ¿Ónde demuérganos taba? Yá sin les voces cafiándola, pudo empezar a recordar. Saliera de la residencia pa cazar a la lluz de la lluna llena… Sí, eso yera lo último que ficiera al aire llibre. Y, cuando taba a puntu de saltar sobre una vaca apetecedera, d’eses pintes con bonos llombiellos, una especie de rayu rosa prendió de sópitu y tiró d’ella p’arriba. Sintióse flotar, entró en daqué metálico, acolumbró unes siluetes allargaes con unes cabeces tremendes y güeyos negros, grandes como güevos de los gordos d’Alimerka… Depués d’aquello, nun recordaba más nada. Bono, que teníen xugao con ella, faciéndola pensar que taba en cuartu cola compañera esa insoportable. ¿Pa qué? ¿A cuánta xente-y taben faciendo lo mesmo? Les puertes perdíense no que paecía un corredor infinitu, y amás nun tuvo tiempu pa contales.
Sonó una alarma rara. La lluz volvióse bermeyo. Teniendo en cuenta qu’acababa de tarmiar al paisanu que-y vieno de gallu a vacilar, supunxo que tou aquel xaréu yera por ella. Confirmólo cuando estremó unes figures rares asomando pel fondu’l corredor, acercándose a les carrenderes pistola en mano.
El tastu raro del calvu dexara a Enedina con ganes de postre.