Nedi… y la otra
Enedina a medianueche
![](https://www.semananegra.org/wp-content/uploads/2024/07/Xon-150x150.jpeg)
Xon de la Campa
2024-07-10
Enedina nun yera una muyer violenta. Nunca lo foi. Refugaba los enfrentamientos y les engarraes. Pero “la otra”…
Enedina yera fía d’un pastor d’oveyes y acompañaba’l pá nel monte cola reciella tolos díes siendo una guaḥa. Una día, una de les sos oveyes preferíes perdióse en monte y Nedi –como la llamaben de cría– perdióse tres d’ella. Pasó nueve díes y nueve nueches sola en monte ensin que naide en pueblu supiese de la neña. Munchos diéronla por muerta. ¿Cómo diba poder sobrevivir una neñína, qu’entá nun cumpliera los diez, sola en monte, con llobos y alimañes?
Al décimu día, Nedi entró peles caleyes enllamorgaes del pueblu, sucia y espeñada, cola oveyina en cuellu. ¡Milagru! Glayaron los vecinos.
Dende entoncies, Nedi, sentía voces peles nueches que la llamaben a tirar pal monte. Voces que-y dicíen de dir correr pente les lladeres y escorrer a los corzos. Los díes de lluna llena yeren los peores. Yá nun yeren solo les voces lo que sentía. Sentía una fame inacabable. Una fame que la tresformaba y volvíala violenta. “La otra”.
—¿Quies que t’enseñe yo lo que ye reise? —entrugó otra vuelta Enedina al home calvu vistíu de negru. Pero esta vegada la sorrisa taba na cara d’Enedina, una sorrisa llarga, descomanada. Qu’enseñaba una filera de canilos infinitos y dañibles.
L’home de negru dio otru pasu haza tras énte la bestia que tenía delantre. En suelu, el camisón fechu xirones de la muyer paecía tamién querer escapar corriendo d’esa “otra” tan diferente. D’esa Nedi montesa, peluda, d’oreyes puntiaes y focicu llargu. Qu’esbabayaba énte la posibilidá de desaciar la fame que sentía otra vuelta, como cuando yera xoven.
—Yo…non —el calvu dio otru pasu y cayó de culu—, nun pretendíemos nada, xúro-ylo —escusóse mientres llevantaba los brazos a mou de proteición.
—¿Nun te gusta la mio sorrisa? —la voz gutural, fonda y bederre de Nedi daba-y respigos al home calvu.
—Nun sabíemos de la so condición, de verdá —siguió miagando l’home de negru—. De sábenlo, enxamás ficiéremos nada en contra…
Nun pudo acabar la fras. D’un gatuñazu certeru, Nedi, esgarró-y el gargüelu y el cuerpu ensin vida del home desplomóse nun champán de sangre.
Nedi llambió’l sangre de les garres. Llueu, sele, púnxose a cuatro pates y foi dando cuenta del calabre. Les voces, por fin, foron apagándose na so mente. Yá solo’l chasquíu de la so mandibula poderosa al frañir güesos y tendones podía sentíse pel escuru pasiellu.