La Selmana Negra de la mio vida
La Semana Negra de mi Vida
![](https://www.semananegra.org/wp-content/uploads/2024/07/1529832753986-2-150x150.jpg)
Inaciu Galán
2024-07-10
Unu de los primeros recuerdos que tengo de la Selmana Negra ye tamién unu de los primeros na vida. Llégame dende la perspectiva de dir en carrín, de mui nenu, un carrín qu’emburriaba mio ma, entrando al recintu de la SN, paezme que na zona d’El Musel entós. Ye quiciabes una de les alcordances de más nenu que conservo. Entrar al recintu y ver la escuridá y les figures negres que decoraben l’espaciu, impactóme abondo.
Años más tarde la Selmana Negra yera, pa los adolescentes de principios del mileniu, como yo, la fiesta de Xixón. Na zona d’El Molinón, diez díes de diversión, atracciones, música… Un llugar nel que, pasu ente pasu, munchos fuimos decatándonos de qu’aquello diba tamién de llibros y de cultura. Gracies a esa convivencia ente lo festivo y lo cultural, que lo ideal ye que vaya xunto, un día mirabes unos llibros, otru parabes un cachín nun actu, y asina, dibes construyendo la to sensibilidá cultural.
Cola mio implicación nel llabor cultural pol asturianu hubo un tiempu de ciertu desencantu col eventu, pola falta de conteníos y receptividá pa col asturianu. Pero como ocurrió cola sociedá asturiana, la Selmana Negra incorporóse tamién de forma decidida al usu normalizáu del idioma, a la promoción de la lliteratura escrita en llingua asturiana, a la desapaición de los prexuicios. Güei ye un eventu nel que la presencia de creadores asturianos qu’escriben na so llingua propia ye dalgo naturalizao dafechu.
Foi na Selmana Negra onde descubrí a munchos autores y editoriales, onde participé como públicu, y col pasu los años, como autor en numberoses meses de diálogu y recitales. Cada etapa de la mio vida “Selmana Negra” significó una cosa distinta, con más o menos cercanía, con más o menos simpatía. Güei mírola como un bien pa Xixón y p’Asturies, como un espaciu que nun ye perfectu, pero que si faltara sedría una perda pa la sociedá.