«Recordar significa pasar otra vuelta pel corazón»
(Fernández-Savater, 2021, p. 7)

La historia construyó discursos hexemónicos qu’enguedeyaron acontecimientos ya invisibilizaron personaxes o grupos sociales. Frente a esto, la recuperación de la memoria histórica ye una ferramienta cola que podemos conocer esa otra parte de la realidá social que foi desplazada, porque «debaxo de la fantasía de poder, escuéndese l’espectru de lo reprimío» (Ruibal, 2009, p. 112). Pero, ¿en cuántos trabayos de memoria histórica s’introdució la perspeutiva de xéneru a la hora d’entender la sociedá de posguerra?

Falando sele ye un proyeutu audiovisual que reflexona sobre cómo anguaño les ciencies sociales siguen ocultando distintes formes de vida, al traviés d’una investigación antropolóxica que pon el focu nesa otredá que foi desplazada. Pa ello, utiliza dos variables que s’entienden separtaes de lo hexemónico. De primeres, les muyeres, como grupu social reprimíu y silenciáu históricamente. Y, de segundes, el mundiu rural como elementu espacial antropizáu que foi arrinconáu por un urbanocentrismu claru qu’ocupa la realidá sociohistórica presente.

Los oxetivos d’esti proyeutu son, de mano, conocer el significáu del trabayu de les muyeres campesines de posguerra pa entendelos dende’l so sentíu políticu como parte de la producción económica familiar y comunitaria. Y, darréu, determinar cómo los cuidaos formaron parte de les estratexes de resistencia antifranquista. Ye dicir, incluyir la perspeutiva de xéneru nun casu concretu, pa entender con fondura la rellación social y económica d’un grupu humanu específicu, pente medies d’entrevistes non estructuraes ya individuales.

Esti estudiu permite entender que’l cuidáu ye l’elementu clave que vertebra a la comunidá rural de posguerra en tolos sos ámbitos. «El cuidáu inclúi tanto l’atención física y afeutiva […] como’l trabayu nes tierres y nes xeres doméstiques» (Narotzky, 1991, p.465). El cuidáu garra un sentíu comunitariu y nun hemos entendelu asociáu al mundiu domésticu puramente, ye un mecanismu social intravecinal. El cuidáu ye un elementu económicu, cuantes que filar, texer, facer manteca, curiar el ganáu, semar, etcétera, son parte de la estabilidá socioeconómica de la familia y a les muyeres atopámosles nos dos ámbitos: domésticu y familiar y nel campu y lo comunitario (anque los datos históricos les relegaren a «los sos llabores» como oficiu únicu). El cuidáu ye un elementu de resistencia. Entendiendo equí esti conceutu como práutiques polítiques que s’oculten baxo práutiques sociales incluyíes na cotidianeidá (Koonz, 1987), como pue ser esconder alimentos debaxo la ropa que diben llavar al ríu, pa suministrar al so home fugáu.

Estos trabayos de cuidaos, o estes redes d’apoyu, foron siempre asociaos de manera natural a un sexu concretu, esencializando y naturalizando los roles d’esti grupu social. Pero hai qu’entender estos actos como elementos socioeconómicos que permiten la estabilidá del grupu, y como estratexes de resistencia venceyaes a la cotidianeidá que faen entender cómo les muyeres que les llevaron alantre yeren opositores del réxime franquista ya persones con axencia propia. Trátase d’una resistencia enmazcarada, la llamada infrapolítica de James C. Scott (2000) que permite que nos separtemos d’esi esencialismu históricu.

Por últimu, el cuidáu permite la construcción d’una memoria, pues na gran mayoría de los casos son les muyeres les encargaes de caltener la memoria familiar en forma de semeyes. «La custodia de la semeya ye siempre femenina […]. Esto rellaciónase col protagonismu de la muyer nel duelu y nel llutu, lo qu’inflúi muncho nel caltenimientu de la memoria de los muertos» (Moreno, p.278, 2019). Estos cuidaos tán intrínsecamente relacionaos cola atención afeutiva de la que falaba Narotzky (1991) y ye tamién a lo que se refier Savater cola cita qu’anicia esti testu.

Introducir entós la perspeutiva de xéneru al tiempu d’entender el funcionamientu de la estructura sociopolítca d’una comunidá rural permite que devolvamos la importancia histórica, social, económica y política que tienen elementos cotidianos, asociaos a lo doméstico, como son los cuidaos. ¿Por qué, entós, esta antropoloxía de tresformación nun furrula? Per un llau, el crecimientu de la pospolítica nos últimos años que niega lo político, entendiendo esto como l’antagonismu que define cualesquier sociedá (Mouffe, 2007) y que s’escuende en conceutos vagos como reconciliación o diálogu. Y, pel otru, una sociedá llíquida (Bauman, 2007) que provoca que «los venceyos humanos […] devienen cada vez más fráxiles y acéutense como provisionales» (p. 9). Ye dicir, nel momentu nel que los cuidaos taben entamando a ser reconocíos como elementos clave a la hora d’estructurar una comunidá, y devolve-yos la importancia histórica que tuvieren, la negación de lo político y una degradación de lo social qu’inunda’l nuestru presente, impídenlo.

Falando sele pretende que perpasemos otra vuelta pel corazón la historia de les nueses güeles, pa recordar aquello qu’una vez nos salvó.

BIBLIOGRAFÍA

Bauman (2007). Vida líquida. PaidÓs.

Fernández Savater (2021). La fuerza de los débiles. Akal.

González Ruibal (2009). Arqueología y memoria histórica. Revista Patrimonio Cultural de España, IPCE, 1, 103-122.

Moreno Andrés, J. (2019). Fotografía y duelo en la transmisión de la memoria de las víctimas del franquismo. El caso de Petra Robles. En Morcate, M. y Pardo, R (eds.). La imagen desvelada. Prácticas fotográficas en la enfermedad, la muerte y el duelo. Sans Soeil Ediciones, pp. 261-289.

Mouffe, (2007). En torno a lo político. Fondo de Cultura Económica.

Scott, C. (2000). Los dominados y el arte de la resistencia. México: ERA.