Como per sidra y música celta pasen los tópicos que calza al asturfalante rurbanu modernu la población xeneral, munches veces tuvi qu’esplicar a un públicu sorprendío por qué nun m’apasionaben nin uno nin otro. De lo primero tampoco nunca tuvi yo mui arguyosu, pero debió sentame mal algún Carmín o ta’l fechu de que nun meza con nada. Sicasí, préstame l’ambiente sidreru y caigo nél de xemes en cuando, un poco como nel folk ciertamente. Pel final del sieglu XX diba muncho a nueches celtes y creo recordar que se pasaba bárbaro, anque tampoco echaba munchu tiempu en mirar pa los Felpeyu o Llan de Cubel qu’aquella nueche tocaren. Polo xeneral pesllaba Dixebra y el Canciu d’amor dedicáu a la bebida patria yera a aquelles xuntances lo que’l Asturias de Víctor Manuel a una romería al usu.

El conceptu de nueche celta axuntaba tolo qu’entós se podía esperar de la música fecha n’asturianu: soníos atlánticos y un poco de rock radical adobáu con gaita pa botar la rapazada, y ente esos dos polos se movía la militancia llingüística daquella con escases escepciones, lo mesmo como oyente que como cuando-y daba por facer música. Nel otru cantu de la vanguardia sónica, la xeneración de grupos a la que la prensa estatal punxo l’alcuñu de Xixón Sound nun paecía mostrar munchu apegu pola llingua autóctona; pela cueta, col restu del movimientu indie español qu’asomó pel 93, fíu de llarga estirpe anglosaxona, compartía la zuna de cantar nun inglés que podía ser bonu o malu, cuando non una xíriga asemántica que fonéticamente lo asonsañaba. D’Undershakers a Australian Blonde, esta foi la llingua preferente d’estes bandes, y de les seis qu’apaecen entrevistaes nel llibru Xixón Sound, de Ramón Lluís Bande (Trabe, 1995) cuatro componen n’inglés y les otres dos, Yellowfinn y Penélope Trip, directamente en guachiguachi [sic].

Esti llibrín coetáneu de Bande ye l’únicu hasta’l momentu dedicáu n’esclusiva a la escena, nel casu de que’l Xixón Sound se pueda considerar asina, y nun dexa de ser chocante que tea escritu n’asturianu. Ye precisamente Ramon Lluis Bande ún de les pontes que se tendieron p’abrir les tendencies qu’estos grupos representaben a la nuestra llingua, y frutu de la iniciativa d’él ye la publicación un par d’años depués de dos discos en comuña, como lletrista, con un ventiañeru Nacho Vegas, tovía integrante de Manta Ray: Diariu (Astro, 1997), EP de cuatro canciones, una per cada parte d’un día que remata en madrugada tráxica, y que lleva de bonus una perguapa versión de La Polesina, una ayalguina que, pal mio gustu, supera na so cenciellez en guapura a la qu’interpreta depués con Lucas 15; y el LP instrumental; y Verdá y consecuencia (Astro, 1997), ideáu como banda sonora d’una serie basada na novelina homónima de Bande (VTP, 1996) discu instrumental sacantes el tema Señardá, onde Nachín arranca a cantar y prefigura la primer vez el Nacho Vegas que depués conoceremos. Nacho y Bande volveríen a xuntase depués en Diariu Dos (Acuarela, 1999), un elepé d’ocho temes qu’algama altura en temes como Caer, rodar o Piedra, arena, tierra.

Del mesmu añu y con asemeyáu toque señaldosu y elegante, anque dexándose querer polos soníos electrónicos cercanos al triphop de la dómina, ye Zuna (Acuarela, 1997), primer EP de Mus, dúu formáu por Fran Gayo y Monica Vacas que vien a ser el primer y únicu grupu estable indie (y valga la esnidiosa y malquerida etiqueta —tamién pa Fran y Mónica— pa entendenos) que se val primordialmente del asturianu na so propuesta. Ignoraos y prácticamente desconocíos n’Asturies, anque bien apreciaos en círculos minoritarios acullá de Payares, la personalidá artística de Mus queda yá configurada nun segundu EP, Pigaz (Acuarela, 1998), onde yá rescampla’l gustu pol cancioneru popular que va ser ún de los pegoyos de la so trayectoria, desplegada en  cuatro LPs bien dignos de repasu y alcordanza: Fai (Acuarela, 1999), El Naval (Acuarela, 2002), Divina lluz (Acuarela, 2004) y, quiciás el más llográu, La vida (Green Ufos, 2007), nun percorríu que va tendiendo de lo electrónico a lo orgánico, ente l’hipnotismu de los paisaxes sonoros creaos por Gayo y la voz evocadora de Mónica, dexándonos una bona riestra de pieces memorables.

Col mileniu’l fuelgu del Xixón Sound va amenorgando, lo mesmo que l’usu del inglés impostáu, qu’empecipia a sustituyise pel castellán nos trabayos caberos d’Undershakers, Australian Blonde o Manta Ray, en consonancia colo qu’asocede a nivel estatal, onde los músicos d’esti ámbitu van dexándose cegar menos pol faru de la cultura anglosaxona y averándose al universu de lo local que los arrodia, cambiu de paradigma que podría exemplificase cola publicación de La leyenda del espacio (RCA, 2007), u Los Planetas, que yá yeren escepción en cuantes al usu del inglés, faciendo’l camín inversu de Camarón, s’averen al acentu y a la tradición flamenca de la so circunstancia granadina, prácticamente invisible nos sos trabayos anteriores. Bandes epigonales como La Bienquerida o Klaus & Kinski apaecíes nesta década participen yá d’esta tendencia. Nel 2007 produzse tamién el llanzamientu del yá mentáu Lucas 15 (Lloria discos, 2007) otru trabayu collaborativu de Vegas, nesta ocasión con Xel Pereda, miembru de Llan de Cubel, formación de la que s’ufierta una perguapa versión de Los fayeos de mayo, que p’abondos oyíos supera al orixinal. Rock alternativu y folk americanu danse la mano nesti trabayu qu’axunta un repertoriu tradicional asturianu intelixentemente escoyíu.

Ente Diariu y Lucas 15, va ser Nacho la personalidá d’aquella xeneración que cortexe más davezu col asturianu na so trayectoria posterior, hasta la inclusión de dos cantares con lletra del poeta Pablo Texón nel so últimu llarga duración, Mundos inmóviles derrumbándose (Oso Polita, 2022). Ta ensin salir entá’l gran discu de Nacho Vegas n’asturianu, anque los que nagüen por él bien pudieron consolase cola apaición d’Ósculos d’agua nel imperiu asturianu (Araz Net, 2018), escelente llibru-discu publicáu pol tamién escritor Xaime Martínez que bebe de riegues sonores anglosaxones asemeyaes, cola aportación propia de la fina ironía, la sabiduría histórica y el particular universu de referencies culturales del autor, que dan como resultáu una obra única, d’altu nivel lliterariu y bien prestosa d’oyer. Tamién de 2018 data l’EP autoeditáu de Melandru, onde l’esperimentu d’amestar el soníu de gaita o flauta a un postrock que tira a escuru ofrez resultaos sorprendentes.

Con Vegas, ye de destacar el papel de Pop Piquiñín, versión n’asturianu de Petip Pop, formación empobinada a públicu infantil que tien publicáu el discu homónimu Pop piquiñín (Músicas del Sastre-Gran Sol, 2014) con integrantes procedentes de bandes como Penélope Trip, Nosoträsh (que yá publicaren en 2001 el tema Nenyures nel recopilatoriu L’asturianu vive, la llucha sigue (XPDLL/L’Aguañaz, 2001) o Undershakers, de les que tovía se dexa tresllucir l’estilu en delles de les pieces más rockeres como Lleváime a los hinchables.

Acullá d’esta xeneración qu’apruciera a metá de los noventa, amás de Xaime Martínez y Melandru, otros proyectos que se mueven per coordenaes paecíes surdíos apocayá, como la cantautora Tania Pereira o’l grupu morciniegu Gente Terrible, incluyen con normalidá temes n’asturianu nel so repertoriu, dellos tan redondos como Sietestrellu o Nun val la soledá, d’estos últimos. Son un exemplu más de cómo la llingua foi abriéndose a lo llargo d’estes dos décades a soníos y públicos que’l statu quo cultural d’a finales del sieglu pasáu-y negaba, nun presente nel que xente como Rodrigo Cuevas, L-R, Ún de Grao, Fruela 757 o Llevólu’l Sumiciu supieron da-y una vuelta de tuerca al folk acomodáu nel celtismu d’aquella dómina, trayendo la tradición a la modernidá dende supuestos nuevos. Y pue paecer poca cosa, pero a ello hemos agradecer los del bable’l fechu de tener cada día que xustificanos menos ante’l públicu xeneral, nel casu frecuente de que nun nos apasionen la sidra nin la música irlandesa como yera esperable.

UN DECÁLOGU DEL INDIE N’AST

Caer, rodar – Diariu

Señardá – Verdá o consecuencia

Una sábana al vientu – Mus

Los fayeos de mayo – Lucas 15

El carmín de la Pola – Nacho Vegas

Nenyures – Nosoträsh

Lleváime a los hinchables – Pop Piquiñín

Tomasín refuga salir de la prisión de Villabona – Xaime Martínez

Sariegu Muertu – Melandru

Sietestrellu – Gente Terrible